İstehlakçıların dayanıqlı və keyfiyyətli elektrik enerjisi ilə təchiz olunması, müasir texnologiyaların paylayıcı şəbəkədə tətbiqi “Azərişıq” ASC-nin fəaliyyətinin başlıca məqsədlərindəndir.

Bu istiqamətin yüksək səviyyədə saxlanılması üçün abonentlər tərəfindən istehlak edilən elektrik enerjisi dəyərinin vaxtında və tam ödənilməsi, enerji itkilərinin azaldılması, debitor borcların yığılması və enerji səmərəliliyinin artırılması  xüsusi əhəmiyyət kəsb edir. Qeyd olunanalar arasında elektrik enerjisinin istehlakı ilə bağlı yaranan debitor borclar, Səhmdar Cəmiyyətin fəaliyyətinə mənfi təsir göstərən amillərdən biridir.

Debitor borcların azaldılması istiqamətində həyata keçirilən tədbirlər sırasına yeni nəsil müasir smart sayğacların quraşdırılmasını göstərmək olar. Belə sayğacların tətbiqi zamanı qanunsuz qoşulmaların və kənar müdaxilələrin aşkarlanması xeyli asanlaşır. Ən başlıcası isə istehlakçı karta yüklədiyi vəsait miqdarında elektrik enerjisi alır və əgər onun borcu mövcuddursa, vəsaitin bir hissəsinin həmin borcun ödənilməsinə yönəldilir. Bu tip sayğacların quraşdırılması işi Səhmdar Cəmiyyət tərəfindən ardıcıl aparılır və eyni zamanda enerji itkilərinin azaldılmasına müsbət təsir göstərir.

Növbəti illər ərzində istismar müddətini bitirmiş sayğacların yeni, müasir sayğaclarla əvəz olunması, quraşdırılan sayğaclar arasında smart sayğacların faiz nisbətinin artırılması, debitor borcların yığılması istiqamətində Səhmdar Cəmiyyət üçün daha böyük hədəflər əldə edilməsinə şərait yaradacaqdır.

Smart sayğacların üstünlükləri barədə Səhmdar Cəmiyyət tərəfindən istehlakçılar arasında davamlı olaraq maarifləndirmə işləri aparılır.