“Azərişıq” ASC tərəfindən istehlakçıların dayanıqlı və keyfiyyətli elektrik enerjisi ilə təchiz olunmasına dair həyata keçirdiyi tədbirlərin ictimaiyyətə çatdırılması onun kommunikasiya strategiyasının əsasını təşkil edir. Bununla əlaqədar olaraq, "Azərişıq” ASC  tərəfindən kütləvi informasiya vasitələrində, sosial şəbəkələrdə sözügedən məsələ ilə bağlı ardıcıl olaraq müvafiq məlumatlar hazırlanaraq ictimaiyyətin diqqətinə təqdim edilir. Bu məlumatlar özündə "Azərişıq” ASC-nin tətbiq etdiyi yeniliklərin vətəndaş məmnunluğunun yüksəldilməsinə xidmət edir.  

“Azərişıq” ASC-nin apardığı ardıcıl məlumatlandırma tədbirləri sırasında istehlak olunan elektrik enerjisinin dəyərinin vaxtında və tam ödənilməsi, həmçinin debitor borclarla bağlı  Cəmiyyətin həyata keçirdiyi tədbirlərin ictimaiyyətə çatdırılması ümdə əhəmiyyət kəsb edir.

Bu istiqamətdə görülən işlərdən biri də elektrik enerjisi istehlakına dair borc barədə arayışın elektron şəkildə əldə olunmasıdır. Müştəri məmnunluğunun təmin edilməsi məqsədilə abonent olduğu  yeri tərk etmədən Elektron  Hökumət  Portalı vasitəsilə  elektrik enerjisi istehlakı ilə bağlı  borcu barədə məlumatları  elektron arayış şəklində əldə edə bilir.  

“Azərişıq” ASC-nin tətbiq  etdiyi  borc  sorğusu xidməti  elektrik enerjisi istehlakı və ödənişləri ilə bağlı məlumat əldə etmək istəyənlər üçün mühüm əhəmiyyət kəsb edir. Bu xidmət elektrik enerjisi  borclarını  asanlıqla  öyrənməyə və ödənişlərini sərfəli şəkildə həyata keçirməyə  köməklik göstərir. Elektrik  enerjisi  borcunun yoxlanılması prosesi onlayn platformalar vasitəsilə və ya müştəri xidmətləri mərkəzlərinin dəstəyi ilə həyata keçirilir. Bunula da abonentlər ödəniş tarixlərini və keçmiş elektrik enerjisi borclarını yoxlayaraq, elektrik enerjisi istehlakını balanslaşdıra bilərlər.

Həmçinin, abonent “Azərişıq” ASC-nin “Azerishiq.az” saytında qeydiyyatdan keçərək müvafiq tələbləri icra etdikdən sonra borc barədə məlumatları əldə etmək imkanına malikdir. Bununla yanaşı, “Azərişıq”  mobil tətbiqindən istifadə  etməklə  istehlakçılar borc barədə məlumat əldə etməklə yanaşı, ödənişləri də həyata keçirə bilərlər.  

“Azərişıq” ASC-nin debitor borcların yığılması istiqamətində tədbirləri barədə vətəndaşların maarifləndirilməsi ardıcıl xarakter daşıyır.