Azərbaycan Respublikası Prezidenti tərəfindən verilmiş tapşırıqlara uyğun olaraq vətəndaşlara göstərilən xidmətlərin elektronlaşdırılması  ”Azərişıq” ASC-nin  daim diqqət mərkəzindədir. Qeyd olunan tapşırığın icrasını təmin etmək məqsədilə “Azərişıq” ASC tərəfindən müvafiq tədbirlər həyata keçirilir.

Belə ki, istehlakçıların enerji təchizatı şəbəkəsinə qoşulması prosedurunun  sadələşdirilməsi və əlçatanlığının təmin edilməsi məqsədilə  bütün xidmətlərin elektronlaşdırılması istiqamətində tədbirlər davam etdirilir.

İstehlakçılara göstərilən xidmətlər  sırasında Enerji Təchizatı Şəbəkəsinə Qoşulma xidmətinin elektronlaşdırılması mühüm əhəmiyyət kəsb edir. Artıq  abonentlər yerləşdiyi ərazini tərk etmədən bu xidmətlə bağlı müraciətlərini elektron qaydada həyata keçirə bilərlər. Bunun üçün   vətəndaşlar https://e-gov.az/ portalı və  ya https://e-service.azerishiq.az/ saytı üzərindən müraciətlərini aidiyyatı üzrə göndərə bilərlər.

Yaradılan bu xidmət, enerji təchizatı şəbəkəsinə qoşulma prosesini daha da optimallaşdıraraq, həm fiziki, həm də hüquqi şəxslər üçün vahid, şəffaf və effektiv platformanı təmin edir.

Xidmətin elektronlaşdırılmasının əsas üstünlükləri aşağıdakılardır:

• Sürətli və rahat müraciət: Vətəndaşlar olduqları ünvandan çıxmadan, internet üzərindən müraciət edə bilərlər. Bu, müraciət prosesini xeyli sürətləndirir və asanlaşdırır

• Məlumatlılıq: Elektron sistem vasitəsilə müraciətin statusunu izləmək və lazım olan məlumatları asanlıqla əldə etmək mümkünlüyü.

• Şəffaflıq və effektivlik: Elektron sistem müraciətlərin şəffaf və obyektiv şəkildə emal edilməsini təmin edir, həmçinin insan faktorundan asılılığı azaldır.

Enerji  Təchizatı Şəbəkəsinə Qoşulma" xidmətinin elektronlaşdırılması ümumilikdə enerji təchizatı şəbəkəsinə qoşulma prosesinin optimallaşdırılmasına, abonentlər  üçün şəffaf və vahid  xidmətin təmin olunmasını şərtləndirir və bu sahədə müsbət irəliləyişləri təşviq edir.

“Azərişıq” ASC  tərəfindən bu istiqamətdə işlər davam etdirilir.