Elektrik təchizati şəbəkəsinə (ETŞ) qoşulmaları üzrə “Azərişıq" ASC tərəfindən göstərilən xidmətlərin elektronlaşdırılması, şəffaflığın artırılmasına, məmur-istehlakçı təmasının aradan qaldırılmasına yönəlməklə yanaşı,  istehlakçıların müraciətlərinə qısa vaxt çərçivəsində baxılmasına imkan yaradır. Tətbiq edilən yeni elektron xidmətlər barədə  istehlakçıların mütəmadi olaraq maarifləndirilməsi və məlumatlandırılması mühüm əhəmiyyət kəsb edir.

Elektrik təchizatı şəbəkələrinə qoşulma üzrə yeni qaydaların tətbiqi və elektron müraciət sistemində müraciətlərin sayının artırılması məqsədilə "Azərişıq" ASC-nin Elektron Müraciətlərin İdarə Olunması Sistemi (EMİOS) daha da təkmilləşdirilmiş və əlçatanlıq təmin edilmiş, məmur-vətəndaş təması minimuma endirilmişdir. EMİOS-un ən üstün cəhətlərindən biri də elektron məlumatlarla yanaşı rəqəmsal sistemlərlə  inteqrasiya oluna bilməsidir. Eyni zamanda bu sistem “Azərişıq" ASC-nin daxili proseslərini avtomatlaşdırmaq, həmçinin müştəriyə göstərilən xidmətlərin keyfiyyətini artırmaq və operativ idarəetməni təmin etmək məqsədi daşıyır.

İstehlakçı, Elektron Hökumət Portalı üzərindən elektron və ya ASAN imza ilə şəxsi kabinetinə daxil olur, VÖEN məlumatı, yaxud FİN nömrəsi daxil etdikdə ona məxsus məlumatlar avtomatik olaraq sistemdə öz əksini tapır.

"Sahibkarların mövcud və inşa ediləcək tikinti obyektlərinin elektrik enerjisi ilə təchizatı prosedurunun sadələşdirilməsi haqqında"  Fərmana uyğun olaraq, bu sahədə bir çox işlər görülmüş, ümumi proseslər sadələşdirilmişdir. Həmçinin "Mikro, kiçik və orta sahibkarlıq subyektlərinin kommunal xidmətlərə qoşulma proseslərinin daha da sadələşdirilməsi haqqında" Fərmana əsasən, sahibkarlar elektrik təchizatı şəbəkələrinə qoşulma üzrə texniki şərtlərin, layihə sənədlərinin hazırlanması və verilməsi, sonrakı mərhələdə fiziki qoşulmanın təmin edilməsi məqsədilə müraciətlərin əhatə dairəsi daha da genişləndirilmişdir.

“Azərişıq" ASC tərəfindən həyata keçirilən işlərin ictimaiyyətə çatdırılması mütəmadi olaraq davam etdirilir.