• Azerbaijan
  • English
  • Russian

Qaynar xətt

 

199 QƏZA XİDMƏTİ

 

"199 Qəza Xidməti" "Azərişıq" Səhmdar Cəmiyyətin idarəetmə strukturunda İnsan Resursları və Xidmət İdarəsinin nəzdində fəaliyyət göstərən bir xidmət qurumudur. "199 Qəza xidməti" öz fəaliyyətində qüvvədə olan respublika qanunvericiliyini,səhmdar cəmiyyətin Nizamnaməsini, xidmətin Əsasnaməsini, səhmdar cəmiyyətin İşgüzar Etik Məcəlləsini,müəssisədaxili normativ aktları, əməkdaşlarının vəzifə təlimatlarını rəhbər tutur. Xidmətin yeni iş üsulu,yeni formada əməliyyat jurnalları,gündəlik hesabat forması təsdiq edilmiş və Xidmət öz işini həmin normativ sənədlərə ciddi riayət etmək əsasında təşkil etmişdir.

 

Bu Xidmətin ən ümdə vəzifəsi istehlakçıların fasiləsiz və dayanıqlı elektrik enerjisi ilə təchizatını təmin etmək üçün istehlakçılardan daxil olan zəngləri,məlumatları,şikayətləri qəbul edib qeydiyyata almaq, həmin zəngləri cəmiyyətin bu təchizatı təmin etməli olan aidiyyəti stukturlarına çatdırmaq və daxil olmuş şikayətlərlə,məlumatlarla bağlı görülmüş işlər barədə həmin istehlakçıları operativ məlumatlandırmaqdır.

 

"199 Qəza xidməti"nin işinin müasir dövrün tələblərinə cavab verəcək bir səviyyədə qurulması üçün səhmdar cəmiyyətin rəhbərliyi tərəfindən xeyli iş görülmüşdür.İlk növbədə, bu xidmətin əməkdaşları yeni xidməti sahə ilə, müasir ofis avadanlığı, ən qabaqcıl texnoloji informasiya vasitələri,xüsusi telefon aparatları,radio və mobil telefonları,Motorola radiostansiyaları ilə,həmçinin,eyni vaxtda həm məlumatı qəbul etmək, kompüterlə işləmək, həm də məlumatı çatdırmağa imkan verən xüsusi qulaqcıqlarla təmin edilmişlər.

 

Səhmdar cəmiyyətin rəhbərliyi tərəfindən "199 Qəza Xidməti" nin və paytaxtın 11 şəbəkə rayonunda, həmçinin 5 şəbəkə sahəsində çalışan telefonçu operatorların işinin yaxşılaşdırılması istiqamətində məqsədyönlü tədbirlər həyata keçirilir.Bu tədbirlər həmin sahədə texniki imkanların genişləndirilməsi,yeni rabitə texnikası və texnologiyalarının tətbiqi nəticəsində şəbəkənin texniki təchizatının gücləndirilməsi və bu müasir avadanlıqları idarə edəcək kadr potensialının səviyyəsinin artırılması istiqamətində qurulur.

 

Belə ki, rabitə sisteminin yaxşılaşdırılması üçün Bakı şəhərinin 9-cu mikrorayonunda "İnterkom"MMC-nin stansiyalar bazasında 25 vatt-lıq ötürücü (retranslyator) quraşdırılmış, "199 Qəza Xidməti" ilə Yasamal və Nərimanov rayonlarında elektrik montyorlarının işində operativliyi təmin etmək üçün köhnə "Mayak" tipli radiostansiyalar 3 ədəd "Motorola" tipli sabit radiostansiyalarla əvəz edilmiş, Qaradağ və Yasamal rayonlarında əlavə olaraq 2 ədəd "Qəza Xidməti" avtomobillərində "Mayak" tipli radiostansiyalar quraşdırılmış, Sabunçu, Nərimanov, Suraxanı, Xəzər rayonlarında "Qəza Xidməti" briqadaları 7 ədəd əl radiostansiyaları ilə təchiz edilmişdir.

 

Zirə ETSS-nin istismar şöbəsində "Mayak" radiostansiyası, Türkan qəsəbəsində xidmət göstərən "Qəza Xidməti" avtomobilinə "Mayak" tipli radiostansiya quraşdırılmışdır.

 

İstehlakçıların zənglərinin rayon(sahə) istismar şöbələrindən "199 Qəza Xidməti"nə istiqamətləndirilməsi məqsədi ilə pilot layihəsi çərçivəsində Nərimanov, Yasamal və Xəzər rayonlarında (5 ədəd) telefon-avtomatlar (avtomatik cavablandıran) quraşdırılmışdır və bu da öz növbəsində əhalinin şikayətlərinin qeydiyyata alınması və onlardan daxil olan zənglər əsasında baş vermiş qəzaların operativ aradan qaldırılmasına nəzarəti gücləndirmək işində əhəmiyyətli rol oynamışdır.

 

Şəbəkəyə daxil olmuş qəza məlumatlarının operativ həll olunması,telefonçu-operatorların peşəkarlıq səviyyəsinin artırılması məqsədi ilə "199 Qəza Xidməti"ndə, həmçinin, bütövlükdə şəbəkədə çalışan bütün telefonçu-operatorlarla həmin kadrlara rabitə vasitələri və kompüter avadanlıqlarına münasibətdə müasir iş prinsiplərinə söykənən bilgilərin öyrədilməsi sahəsində müvafiq tədris kursları təşkil edilmiş və şəbəkənin texniki təchizatı gücləndirildikcə ixtisasartırma kurslarının davamlı həyata keçirilməsi nəzərdə tutulur.

 

"199" Qəza xidməti"nin baş operatorları,operatorları və həmçinin, 11 şəbəkə rayonunda, həmçinin 5 şəbəkə sahəsində çalışan telefonçu operatorlar üçün xüsusi tədris planı əsasında treninq-məşğələlər təşkil edilmiş və tədrisin yekununda sınaq imtahanları keçirilmişdir.

 

"Azərişıq" ASC-nin 3 əsas rayonunda telefon vasitələrinin avtomatlaşdırılması prosesi başa çatdırılmışdır. İstehlakçılar tərəfindən vurulmuş zənglər "199 Qəza xidməti"nə yönləndirilir.Avtomatlaşdırmanın əsas məqsədi,bütün informasiyaların mərkəzləşdirilməsi,operativ xidmətin təşkili,ümumi struktur bölmələr üzrə məlumatların operativ çatdırılması,abonentlərə fasiləsiz elektrik enerjisinin ötürülməsi,rayon ərazilərində açılmaların, qəzaların, partlayışların, yanğınların və əhalinin enerjisiz qaldığı ərazilərin dəqiqləşdirilməsi,şəbəkənin dayanıqlılığının saxlanılmasıdır.

 

"199 Qəza xidməti" təkcə Texniki Direktorluğun nəzdində olan Rayon İstismar şöbələri ilə deyil,eləcə də Satış Departamentinin rayon(sahə) satış şöbələri ilə üzvü əlaqədə çalışır. Daxil olan zənglərin əksəriyyəti abonentlərin enerji borclarının öyrənilməsi və ya dəqiqləşdirilməsi ilə bağlı olur.

 

"Azərişıq" ASC-də qaynat xətt məhz " 199 Qəza Xidməti" vasitəsi ilə həyata keçirilir. Belə ki, 199 saylı telefon vasitəsilə abonentlər istənilən qəza haqqında ASC-yə məlumat verə, baş vermiş açılmalar və problemlərlə bağlı operativ məlumat ala bilərlər. Qəza xidməti 24 saat fəaliyyət göstərməklə bərabər, eyni anda 30 abonentin telefon zənginə cavab vermək imkanına malikdir.

 

Yaxın vaxtlarda bu xidmətin imkanlarının daha da genişləndirilməsi üçün səhmdar cəmiyyətin rəhbərliyi "199 Qəza xidməti"ndə mərkəzləşdirilmiş zənglər sisteminin tətbiqini həyata keçirməyi planlaşdırır.Bu isə istehlakçılara göstəriləcək xidmətin keyfiyyətinin dünya standartlarına çatdırılması üçün ciddi zəmin yaradacaqdır.